Akrakirkja (1900)

Akrakirkja

 

Ljósmyndir frá notendum kirkjukort.net

Saga kirkjunnar

Akrakirkja er í Borgarprestakalli í  Borgarfjarðarprófastsdæmi.  Hún var byggð árið 1900.  Kirkja hefur staðið að Ökrum allt frá kristnitöku en fyrstu heimildir eru frá því um 1200.  Kaþólskar kirkjur voru helgaðar Maríu guðsmóður og prestur sat þar fram undir siðaskipti.  Akrar tilheyrðu Hítarnesþingum, sem voru lögð niður 1880 og sóknin lögð til Staðarhrauns og síðan til Borgar 1950.  Tveim árum síðar aftur til Staðarhrauns og að nýju til Borgar 1970.
 

Árið 1899 var kirkjan endurbyggð og stækkuð.  Á árunum 1986-87 voru gerðar miklar endurbætur á kirkjunni.  Hún er timburkirkja, klædd bárujárni og grunnurinn er hlaðinn.  Veggir kirkjunnar að innan eru skreyttir með marmaramálningu og hvelfingin yfir kór er blámáluð.

Akrakirkja er timburhús, áttstrend að grunnfleti, 10,85 m að lengd og 6,55 m á breidd. Hliðarveggir eru 6,60 m að lengd, hornsneiðingar eru 2,80 m að lengd en framhlið og kórbak 2,90 m á breidd. Þakið er krossreist og upp af vesturstafni er áttstrendur burstsettur turn með áttstrenda spíru. Oddbogadregið hljómop er á framhlið turns og undir turni er breiður stallur. Kirkjan er bárujárnsklædd en turn og turnþök klædd sléttu járni og hún stendur á steinhlöðnum sökkli. Á hvorri hlið kirkju eru þrír smárúðóttir gluggar úr steypujárni, oddbogadregnir að ofan, einn á hverri hinna fjögurra hornsneiðinga, einn á framstafni kirkju og að auki hringgluggi yfir honum. Fyrir kirkjudyrum eru vængjahurðir og oddbogagluggi yfir þeim.

Inn af dyrum er forkirkja og í henni stigi til sönglofts yfir forkirkju og fremsta hluta framkirkju. Að framkirkju eru spjaldsettar vængjahurðir og gangur inn af þeim og bekkir hvorum megin hans. Kór er hafinn yfir kirkjugólf um þrjú þrep. Veggir eru klæddir málningarpappa og marmaramálaðir. Á mörkum framkirkju og kórs eru þrír oddbogar og undir þeim tvær stoðir og sín hálfstoð við hvorn vegg. Hálfstoðir eru hvorum megin altaris. Milli stoða í kór eru oddbogar og oddbogahvelfingar og yfir frambrún sönglofts eru þrír oddbogar. Reitaskipt og stjörnusett oddbogahvelfing er yfir innri hluta framkirkju en flatt loft yfir sönglofti.

Friðuð 1. janúar 1990 samkvæmt aldursákvæði 1. mgr. 36. gr. þjóðminjalaga nr. 88/1989.

Ljósmynd Friðjón Árnason Melgerði, Lundareykjardal, Borgarfirði.


 

Akrakirkja - Staðsetning á korti.

 


Akrakirkja - Beinn hlekkur

Viljir þú vísa inn á þessa síðu þá má nota hlekkina hér að neðan. Beinir hlekkir inn á síðuna hjálpa okkur að dreifa henni og láta einnig leitarvélar þekkja síðuna betur.

Hlekkur

Hlekkur með mynd