Áskirkja í Reykjavík (1983)

Áskirkja í Reykjavík

 

Ljósmyndir frá notendum kirkjukort.net

Saga kirkjunnar

Ásprestakall er í Reykjavíkurprófastsdæmi vestra og afmarkast af Holtavegi, Suðurlandsbraut, Reykjavegi, Sundlaugavegi og Dalbraut.

Ássöfnuður var stofnaður á fundi í Laugarásbíói 22. september árið 1963 og á þeim fundi var fyrsta sóknarnefndin kjörin. Samkvæmt skráðum heimildum voru helstu rökin fyrir stofnun Ásprestakalls þau að innan marka þess voru þá búsettir 4000 íbúar og fjölmennt elliheimili Hrafnista var risið og stækkun þess fyrirhuguð. Einnig var ráðgert að reisa fleiri íbúðir og þjónustustofnanir fyrir aldraða í sókninni. Auk þess var stórt sjúkrahús, Kleppsspítali í prestakallinu. Eðlilegt þótti að tengja brýna prestsþjónustu á þessum stofnunum hóflega stórri sókn, en sóknirnar beggja vegna sóknarmarkanna þóttu of fjölmennar til að bæta slíkri þjónustu á þær. Nú á síðustu árum hafa þær breytingar orðið að Hrafnista í Reykjavík hefur fengið heimilisprest og Kleppsspítali fellur undir verksvið sjúkrahússpresta. Hinsvegar hefur hjúkrunarheimilið Skjól bæst við þjónustu Áskirkju, ásamt Fríðuhúsi, sem er dagvistun fyrir Alzheimersjúklinga. Íbúatala sóknarinnar hefur lítið breyst og telur nú liðlega 4100 íbúa.

Fyrstu árin voru guðsþjónustur safnaðarins í Laugarneskirkju og Laugarásbíói, en síðasta áratuginn fyrir vígslu Áskirkju voru guðsþjónusturnar í Norðurbrún 1.

Sr. Grímur Grímsson, þáverandi sóknarprestur tók fyrstu skóflustunguna að grunni Áskirkju 16. september árið 1971.

Kirkjan er byggð eftir teikningu arkitektanna Helga Hjálmarssonar, Vilhjálms Hjálmarssonar og Haraldar V. Haraldssonar og hefur Haraldur annast alla hönnun hússins innan dyra og er öll sérsmíði innréttinga og ýmiss búnaðar hugverk hans.

Biskup Íslands, herra Pétur Sigurgeirsson vígði Áskirkju, þriðja sunnudag í aðventu árið 1983, sem þá bar upp á 11. desember. Við athöfnina fluttu herra Pétur Sigurgeirsson, biskup og Þórður Kristjánsson, sóknarnefndarformaður bænir. Ritningarlestra lásu herra Pétur Sigurgeirsson, biskup, Sr. Árni Bergur Sigurbjörnsson, sóknarprestur Áskirkju, Helga Guðmundsdóttir, formaður Safnaðarfélags Ásprestakalls, Sr. Grímur Grímsson, frv. sóknarprestur, Sr. Ólafur Skúlason, vígslubiskup og Kristján Sigtryggsson, organisti Áskirkju. Herra Pétur Sigurgeirsson, biskup predikaði og Sr. Árni Bergur Sigurbjörnsson, sóknarprestur flutti ávarp. Kirkjukór Áskirkju söng undir stjórn Kristjáns Sigtryggssonar organista.Hljóðfæraleik önnuðust Guðrún Birgisdóttir á flautu, Gústaf Jóhannesson á orgel, Jón Sigurðsson á trompet, Lárus Sveinsson á trompet, Ragna Gunnarsdóttir á sello og Valur Pálsson á kontrabassa.

Ljósmynd Þorsteinn H. Ingibergsson.


 

Áskirkja í Reykjavík - Staðsetning á korti.

 


Áskirkja í Reykjavík - Beinn hlekkur

Viljir þú vísa inn á þessa síðu þá má nota hlekkina hér að neðan. Beinir hlekkir inn á síðuna hjálpa okkur að dreifa henni og láta einnig leitarvélar þekkja síðuna betur.

Hlekkur

Hlekkur með mynd