Reynistaðarkirkja (1870)

Reynistaðarkirkja

 

Ljósmyndir frá notendum kirkjukort.net

Saga kirkjunnar

Reynistaðarkirkja er í Glaumbæjarprestakalli í Skagafjarðarprófastsdæmi. Reynistaður er bær, kirkjustaður og fyrrum klaustur vestan Héraðsvatna, 10 km sunnan Sauðárkróks. Nunnuklaustur af Benediktsreglu  var stofnað að Reynistað 1295 og stóð það til 1552.  Engar kunnar heimildir greina frá fyrstu kirkju staðarins en líklega reis þar kirkja, þegar eftir lögleiðingu kristninnar.  

Reynistaður hefur þá sérstöðu að hafa verið jarlssetur, en Gissur jarl Þorvaldsson keypti jörðina vorið 1259 og fluttist þangað.  Kirkju er næst getið á Reynistað þegar Gissur jarl dó 12. ja. 1268 og er sagt að hann sé grafinn í gólfi kirkjunnar, eins og algengt var um höfðingja þess tíma.  Nokkru áður en Gissur dó hafði hann gefið Reynistað til klaustursstofnunar.  Klaustur var samt ekki stofnað þar fyrr en Jörundur Hólabiskup setti á fót nunnuklaustur árið 1295, en jörðin hafði verið í umsjón biskupsstólsins á Hólum frá því Gissur andaðist. Jörundur biskup setti þar Benediktsreglu og helgaði staðinn og kirkjuna Guði og heilagri Maríu mey.

Fyrir stofnun klaustursins hafði kirkjan á Reynistað verið helguð Stefáni frumvotti. Biskup lagði klaustrinu til 23 jarðir í stofnfé. Það var með klaustrið eins og biskupssetrið að það efnaðist mikið á fólki sem fékk þar athvarf, en lagði í staðinn eignir með sér, eða ef fólk var ekki öruggt um sína sálarheill þá gaf það oft heilu jarðirnar til klaustursins í von um að sleppa vel úr hreinsunareldinum.  Einnig lögðu þeir, sem áttu dætur í klaustrinu, oft ríkulega  með þeim.  Núverandi kirkja var byggð milli 1868-70.  Forkirkjan var reist 1950.  Prédikunarstóllinn er yfir altari kirkjunnar (aðeins 5 aðrar slíkar kirkjur á Íslandi).  Hún er útkirkja frá Glaumbæ síðan 1960 og var áður þjónað frá Sauðárkróki.  Reynisstaðarklaustursþing var sjálfstætt prestakall til 1880.

Ljósmynd Friðjón Árnason Melgerði, Lundareykjardal, Borgarfirði.


 

Reynistaðarkirkja - Staðsetning á korti.

 


Reynistaðarkirkja - Beinn hlekkur

Viljir þú vísa inn á þessa síðu þá má nota hlekkina hér að neðan. Beinir hlekkir inn á síðuna hjálpa okkur að dreifa henni og láta einnig leitarvélar þekkja síðuna betur.

Hlekkur

Hlekkur með mynd